Наш адрес: г. Осиповичи, ул. Сумченко, 55.

“Рокерскія” выхадныя прайшлі ў Асіповічах

Опубликовано: Мария ТАЛЕЙКО

Вторник, 20.06.2017 08:34. Рубрика: Да 145-годдзя Асіповічаў, Культура  Tags: ,   

Асіповічы — горад яшчэ адносна малады, але ўжо з гонарам можа святкаваць свае “годдзі”. Зараз жыхары раёна актыўна рыхтуюцца да 145 гадавіны райцэнтра, і з гэтай нагоды праходзіць шмат самых розных мерапрыемстваў. Напрыклад, у выхадныя Асіповічы сталі месцам збору аматараў байкаў і року з розных куточкаў краіны і нават з-за мяжы.

“Байк-Рок Фестываль-2017” сабраў удзельнікаў на базе адпачынку “Вяззе”. Пачаўся фэст а 17 гадзіне ў пятніцу, і ўрачыстае адкрыццё плаўна перайшло ў канцэртна-конкурсную праграму. Працягнуліся выступленні музыкантаў і на наступны дзень. Дарэчы, сёлета на традыцыйным фестывалі байкаў і року выступілі 30 гуртоў, у тым ліку і хэдлайнеры мерапрыемства — “Лепрыконсы”, “Дай Дарогу!”,  “ТТ-34” і “The VALERA”.  Геаграфія рокераў уражвае: Мінск, Віцебск, Гродна, Брэст, Масква, Санкт-Пецярбург, Твер, Смаленск… Цікава, што апошні горад прадстаўлялі зусім маладыя рокеры — дзіцячы гурт “SmoLKIDS”, дзяўчаты з якога ярка выдзеліліся на фоне дарослых музыкантаў.

За тры дні фестывалю на беразе Асіповіцкага вадасховішча пабывала больш за 1000 удзельнікаў і гасцей свята, сярод якіх 30 прадстаўнікоў Расійскай Федэрацыі, 6 — з Украіны і нават байкер з Польшчы. Што тычыцца асіпаўчан, то іх было дзесьці паўтары сотні.

Адным з яркіх момантаў фэсту стала наведванне байкерамі райцэнтра. 250 матацыклаў праехалі па галоўнай вуліцы горада і выстраіліся на плошчы, дзе правялі конкурс па самай павольнай яздзе, а з майстар-класам выступіў прызёр чэмпіянату Еўропы па стантрайдзінгу Уладзімір Пятроў. Прысутнічалі і павіталі ўдзельнікаў мерапрыемства і старшыня райсавета дэпутатаў Аляксандр Пузік, намеснік старшыні райвыканкама Ганна Землянухіна, намеснік начальніка аддзела адукацыі, спорту і турызму райвыканкама Міхаіл Грыгорчык. Правялі тут і дабрачынную акцыю “Падары дзецям шарык”: грошы, атрыманыя за прыблізна паўсотні яркіх паветраных шароў, будуць накіраваны на рахунак мясцовай спецшколы.

Адметна, што ў розыгрышы па ўваходных білетах фестывалю ўдача ўсміхнулася менавіта асіпаўчаніну — Алегу Драмарэцкаму. Яму дастаўся “трафейны” матацыкл, які мужчына тут жа прэзентаваў мясцоваму дзіцячаму мотаклубу “Легіён”.

— Упершыню такое мерапрыемства мы правялі ў 2007 годзе, — успамінае адзін з арганізатараў, індывідуальны прадпрымальнік Канстанцін Дубінчык. — Натуральна, розніца вялікая ва ўсіх накірунках. У разы больш стала ўдзельнікаў, музыкальных гуртоў, проста гасцей. Сур’ёзны маштаб запатрабаваў і вялікай арганізацыйнай работы, у тым ліку вырашэння розных бытавых пытанняў, аховы правапарадку. Прыцягнулі да гэтага шмат мясцовых арганізацый і ўстаноў: ФСК “Алімпія”, РАУС і ДАІ, РАНС, медыкаў, ратавальнікаў з райтаварыства ратавання на вадзе, УКП ЖКГ, 51 артбрыгаду, гандляроў. Карацей, прыклалі ўсе намаганні, каб фестываль, прысвечаны 145-годдзю роднага горада, ярка запомніўся кожнаму!

Па водгуках тых, хто правёў гэтыя выхадныя на нашым фэсце, усе засталіся задаволеныя. Чакаем у будучым зноў!

Марыя ТАЛЕЙКА. Фота Ганны АБРАМКIНАЙ.

Твитнуть 0

Добавить комментарий

« Ограничение вычета сумм НДС по товарам в случае их                                                    потери и порчи
Футбол, 1 лига. Осиповичи — Орша — 1:1 (1:0) »