Прымеркаваны да Года культуры творчы праект “Фестываль народных талентаў Магілёўшчыны”, арганізатарамі якога выступілі галоўнае ўпраўленне ідэалагічнай работы, культуры і па справах моладзі аблвыканкама і абласны метадычны Цэнтр народнай творчасці і культурна-асветніцкай работы, які стартаваў у сакавіку, набліжаецца да фінішу. У ім прымаюць удзел усе раёны Магілёўшчыны, прадстаўляючы на суд жыхароў абласнога цэнтра самыя лепшыя напрацоўкі ў сферы культуры. За гэты час на базе метадычнага Цэнтра творчыя прэзентацыі прадэманстравалі ўжо 16 раёнаў, у тым ліку і Асіповіцкі. Сваю праграму землякі прадстаўлялі ў мінулы чацвер.
У фае Цэнтра народны ансамбль народнай песні “Вязанка” Вяззеўскага сельскага Дома культуры запрашаў гасцей свята дакрануцца да народных традыцый. Разам з удзельнікамі калектыву пад гукі гармоніка і цымбалаў жадаючыя танчылі беларускія бытавыя танцы. Тут жа размясціліся выставы вырабаў майстроў Асіповіччыны. Прыцягвалі ўвагу каларытнасцю і самабытнасцю работы Iрыны Забаўскай (вышыўка), Таццяны Шунькінай (лоза-пляценне), Кацярыны Юркавец і Веранікі Шынкаровай (кераміка), Святланы Чараватай (тэкстыльная лялька), Вольгі Лапікавай (тэхніка “ф’юзінг”), Вольгі Наўдзюнас (ручное ткацтва ) і Валянціны Прасаловіч (сухое валянне). Дзве апошнія праводзілі майстар-класы па ткацтве паясоў і вырабе лялек з воўны. Наведвальнікі цікавіліся і фотавыставай “Зямля пад белымі крыламі”, дзе прадстаўляліся работы народнага фотаклуба “Раніца”. Мнагалюдна было і каля інфармацыйнага стэнда “На гасціннай зямлі Асіповіцкай”, падрыхтаванага цэнтралізаванай бібліятэчнай сеткай. Магіляўчане праявілі значны інтарэс да прадстаўленай на ім друкаванай прадукцыі — вынікамі шматгадовай плённай працы на ніве мясцовага краязнаўства.
Затым гасцей свята за-прасіла канцэртная зала “Магілёў”. Перад пачаткам кіраўнік фотаклуба “Рані-ца” Алена Ерашэвіч пры дапамозе тэхнікі малявання пяском праілюстравала легенду пра ўзнікненне нашага горада, пасля чаго сцэна была прадастаўлена яркім і таленавітым калектывам і салістам нашага краю. З небывалай энергіяй і запалам выступілі мужчынская група народнага ансамбля народнай песні “Сузор’е”, узорны ансамбль танца “Асарці” і народны ансамбль эстраднага танца “Каприз”, чым заваявалі любоў гледачоў і выклікалі бурныя апладысменты. Сваім талентам, высокім прафесіяналізмам і станоўчымі эмоцыямі дзяліліся народны ансамбль народнай песні і музыкі “Дзівакі”, узорны харэаграфічны ансамбль “Крынічка”. Студыя эстраднага танца “Puzzle” прадэманстравала зладжанасць і віртуознасць рухаў і стварыла пазітыўны настрой у зале. Публіка спявала разам з салістамі народнага эстраднага ансамбля “Парадиз”. На вышыні аказаліся і нумары мастацкай самадзейнасці ў выкананні юнай спявачкі Дар’і Моцевіч, а таксама Вольгі Касьянавай і Аляксандра Мацвеёнка. Апошняму ўдалося “завесці” ўсіх не горш за Стаса Міхайлава! Парадавалі сваім майстэрствам і юныя самадзейныя артысты ўзорнай эстраднай студыі “Хваля”.
У фінале мерапрыемства намеснік старшыні райвыканкама Аляксандр Шаўлюга перадаў сімвал фестывалю Слаўгарадскаму раёну.
Ніна ВIКТОРЧЫК.