Асіповіччына: новым фермам быць!

У дакументах па рэканструкцыі і пераабсталяванні малочнатаварных ферм будзе значыцца не толькі мінулы, як планавалася ў пачатку гэтай маштабнай справы, а і 2013 год. Такая сітуацыя характэрна як для нашага раёна, так і для краіны ў цэлым. Што ўжо ўдалося зрабіць у гэтым плане на Асіповіччыне, а якія справы давядзецца завяршаць сёлета і расказвае дырэктар УКВП «Капітальнае будаўніцтва” Сяргей Падбярозны:

— Перавагу маюць сельгаспрадпрыемствы, якім была адкрыта крэдытная лінія «Белаграпрамбанка”: калгасы «Новы шлях”, «Каўгарскі”, «Авангард” і ААТ «Асіповічыаграпрамтэхзабеспячэнне”. Калі розніца ва ўзвядзенні кароўні-каў № 1 не такая адчувальная — паўсюдна, акрамя СВК «Калгас «Ясень”, устаноўлены каркасы, сценавыя панэлі, — то на даільна-малочных блоках «разрыў” адчуваецца істотна. Цалкам каркасы стаяць у названых чатырох гаспадарках, тут да фінішу набліжаецца ўстаноўка сценавых панэляў, у пэўнай ступені гатовы ўнутраныя фундаменты даільна-малочных блокаў, у наяўнасці сэндвіч-панэлі для тарцоў і матэрыялы для даху.

— Выходзіць, актыўна работы вядуцца толькі ў крэдытуемых сельгаспрадпрыемствах?
— На цяперашні час — так. Хаця, «Ясень” з-за самага большага адставання спрабуе выправіць сітуацыю: у Заельніку ідзе зборка драўляных каркасаў для мантажу — работа, якую другія выканалі яшчэ паўгода назад. Пра даільна-малочны блок тут гаварыць наогул рана.

— Зразумела, што лідары тыя, хто атрымаў крэдыт. А хто больш за ўсё ўклаў сродкаў у новае будаўніцтва з астатніх гаспадарак?

— Больш чым на 1,6 мільярда рублёў выканана работ у «Бярэзіне”, на 1,7 — у калгасе імя Чарняхоўскага.

— Ці ёсць неасвоеныя крэдытныя сродкі?

— У «Новым шляху” ўсе выдзеленыя сродкі асвоены, у «Авангардзе” рэшткі 0,1795 мільярда рублёў. А вось «Каўгарскаму” трэба яшчэ ўкласці ў справу 0,8595 мільярда, «Асіповічыаграпрамтэхзабеспячэнню” — 0,5793. Неасваенне сродкаў адбылося з-за адсутнасці рэсурсаў, зараз дакументы на аплату знаходзяцца ў банку.

— Нягледзячы на тое, што ў некаторых гаспадарках рэканструкцыя адбываецца належнымі тэмпамі, ход работ пайшоў не зусім так, як планавалася першапачаткова…

— На гэта паўплываў шэраг аб’ектыўных прычын, але справы не пушчаны на самацёк: за кожным новым сельгасаб’ектам замацаваны пасадавыя асобы, часты наведвальнік будаўнічых пляцовак старшыня райвыканкама Пётр Шукаловіч. Дзякуючы яму, дарэчы, многія пытанні, якія тычацца будоўлі, знаходзяць хуткае і аптымальнае вырашэнне.

— Якія задачы стаяць на студзень?

— Завяршыць работы па закрыцці «контуру” даільна-малочных блокаў у крэдытуемых гаспадарках, да канца давесці мантаж сэндвіч-панэляў, устаноўку варот і накрыццё даху. Словам, зрабіць усё, каб запусціць ацяпленне і прыступіць да ўнутранай аддзелкі і мантажу даільнага абсталявання.
Валянціна КОРБАЛЬ.